Saga Meniga

Fjártæknifyrirtækið Meniga var stofnað árið 2009 af frumkvöðlunum Georgi Lúðvíkssyni, Ásgeiri Erni Ásgeirssyni og Viggó Ásgeirssyni. Hugsjón stofnendanna var frá upphafi að byggja upp alþjóðlegt fyrirtæki sem hefði það að markmiði að hjálpa fólki að stýra heimilisfjármálunum sínum og gera þau einfaldari og skemmtilegri og nýta til þess nýjustu tækni í hugbúnaðargerð.

Fyrsti viðskiptavinur Meniga var Íslandsbanki og fór lausnin í loftið í samstarfi við bankann á stofnári Meniga 2009 og í kjölfarið í samstarfi við Arion banka og Landsbankann í ársbyrjun 2010. Meniga hlaut strax frá byrjun mjög góðar viðtökur á Íslandi og hefur allar götur síðan notið mikillar velvildar.

Vorið 2010 fjárfesti íslenski fjárfestingasjóðurinn Frumtak í Meniga, sem gerði fyrirtækinu kleift að opna söluskrifstofu í Stokkhólmi. Það leiddi til þess að Meniga náði að selja hugbúnað sinn til tveggja meðalstórra skandinavískra banka, Skandiabanken í Noregi og Svíþjóð og Säästöpankkilitto í Finnlandi árið 2011. Í framhaldi af því óx Meniga hratt í Evrópu.

Í ársbyrjun 2014 flutti Meniga sölu- og markaðsstarfsemi sína til London, miðstöðvar fjármálatækni í Evrópu, og í janúar 2016 voru höfuðstöðvar fyrirtækisins fluttar til Bretlands. Í ársbyrjun 2019 keypti Meniga svo sænska fjártæknifyrirtækið Wrapp og varð þar með leiðandi í sölu og markaðssetningu endurgreiðslutilboða á Norðurlöndum.

Meniga rekur skrifstofur í 3 löndum. Starfsmenn fyrirtækisins eru um 80 í Turninum í Kópavogi, Varsjá og London. Hugbúnaður Meniga hefur verið innleiddur hjá yfir 165 fjármálastofnunum og er aðgengilegur rúmlega 90 milljónum manna í meira en 30 löndum. Meðal viðskiptavina eru margir stærstu bankar heims, þeirra á meðal Unicredit, Swedbank, BPCE, Santander, Commerzbank, ING Direct og Intesa Sanpaolo.

Í dag er Meniga leiðandi í þróun og sölu heimilisfjármálahugbúnaðar og nýrrar kynslóðar hugbúnaðar fyrir net- og farsímabanka fjármálastofnana um allan heim. Rúmlega 90% tekna fyrirtækisins koma frá útlöndum. Hugbúnaður Meniga hefur hlotið fjölmörg verðlaun og viðurkenningar hér á landi og erlendis.

Meniga hefur notið dyggs stuðnings fjárfesta en stærstu hluthafar fyrirtækisins auk stofnenda eru íslensku fjárfestingasjóðirnir Frumtak og Kjölfesta, hollenski fjárfestingasjóðurinn Velocity og sænski fjárfestingasjóðurinn Industrifonden.

Mesta gæfa Meniga og stærsti lykillinn að velgengni fyrirtækisins er þó mannauðurinn en Meniga hefur í gegnum tíðina laðað til sín framúrskarandi starfsfólk.

Alþjóðleg starfsemi

Meniga er alþjóðlegt fjártæknifyrirtæki með um 80 starfsmenn, starfsstöðvar í 3 löndum og viðskiptavini í rúmlega 30 löndum. Yfir 90% af tekjum fyrirtækisins koma frá erlendri starfsemi þess.

Stærstur hluti tekna Meniga kemur annars vegar frá fjármálastofnunum, oftast bönkum, sem semja við Meniga um afnotagjöld af hugbúnaði sem þeir síðan leyfa sínum viðskiptavinum að nota. Þessir bankar geta boðið netbankanotendum sínum að nýta alla helstu virkni Meniga.

Hins vegar fær Meniga tekjur með því að semja við fyrirtæki um að veita notendum Meniga sérsniðin endurgreiðslutilboð sem Meniga telur að þjóni hagsmunum sinna notenda. Meniga fær þóknun frá fyrirtækjum fyrir þau endurgreiðslutilboð sem notendur meniga.is nýta sér og fyrir að veita fyrirtækjum aðgang að ópersónugreinanlegum samantektum úr kerfum Meniga sem sýna neysluhegðun notenda. Þessi þjónusta er einnig í boði á Norðurlöndum í samstarfi við suma af stærstu bönkunum þar.

Hægt er að kynna sér vörur og þjónustu Meniga á alþjóðlegum vef fyrirtækisins www.meniga.com.